بیر های قالخیر وجدانیمدان ـ قانیمدان

قانیم جوشور دامار ـ دامار جانیمدان

جانیم الهام آلیر هئی وجدانیمدان

معلول کیمدی؟ دوزگون انسان یارانمیش

(نَفَختُ روحی)دن، بیر جان یارانمیش

***

انسانلیغا نشان نه بوی نه تن دی

تن روح اوچون یالنیز قورو وطن دی

وطنین حیاتی روحدان بیتن دی

دوشونجه دن کئچیر انسانلیق یولو

بونو قانان عزیز سانار معلولو

«شبستر»ین سولماز «گلشن راز»ی

«معجز»ین معجزی، برگ و بیاضی

«ناظر» شبسترین صون امتیازی

«شرفخانه» شرفلندی آدیندان

دویمادیق سؤزوندن دوزو ـ دادیندان

***

گؤزل «آذربایجان»، بیزیم افتخار

ارن لر یوردو دور دیار به دیار

ناظر ده «گونئی» ده یئنی «شهریار»

هم فقیه، هم ادیب، اولو «ملک پور»

عرفان ایشیغیندان دولو ملک پور

***

«طالبیّه» مدرسه سی، مکتبی

شهریارلا قوشا آلدی مطلبی

فقاهت، فلسفه، علمی ـ ادبی

استادلار ایچینده ضرب المثل دی

سؤزوده، اؤزو تک دولغون ـ گؤزل دی

حق وئریبدیر امتحان وجهی مقام، معلول لارا

حضرت ایوب(ع) تک قیل احترام معلول لارا

بورجلودور واللهی بالله بو نظام معلول لارا

حق خدمت اولماییبدیر چون تمام معلول لارا

فرض دیر منده ائدم عرض سلام معلول لارا

***

معلولون دائم عذاب ایچره یانیر روح و تنی

سولماسین بو گوللرین یارب مبارک گولشنی

چوخ چتین دیر اشتغال و ازدواج و مسکنی

سسله ییر امداده دائم ملت ایله میهنی

فرض دیر دولت قیلا خدمت مدام معلول لارا

(«اورمو»مون تشنه دوداقلاری دوشرکن یادینا

یاش دئمم؛ قان اله یر «تبریز»یمین دیده لری)

تبریزلی استاد «رضا افشار»



تهران ـ ۱۳۹۵/۰۳/۰۴
رضا افشار ـ بیت الله جعفری

قورودو «اورمو گؤلو»؛ اولدو «زلیخا» جگری

کاش وئره «روح الامین»، «یوسف مصر»ه خبری

بو گناه بیزده دی واللّهی طبیعتده دئگیل

حکیم الله آییریب دنیادا خیر ایله شری

هدره یوللاماییب بیر بئله آیات و کتاب

شردن آرتیق ائله ییب خیره دلالت بشری