«شبستر»ین سولماز «گلشن راز»ی

«معجز»ین معجزی، برگ و بیاضی

«ناظر» شبسترین صون امتیازی

«شرفخانه» شرفلندی آدیندان

دویمادیق سؤزوندن دوزو ـ دادیندان

***

گؤزل «آذربایجان»، بیزیم افتخار

ارن لر یوردو دور دیار به دیار

ناظر ده «گونئی» ده یئنی «شهریار»

هم فقیه، هم ادیب، اولو «ملک پور»

عرفان ایشیغیندان دولو ملک پور

***

«طالبیّه» مدرسه سی، مکتبی

شهریارلا قوشا آلدی مطلبی

فقاهت، فلسفه، علمی ـ ادبی

استادلار ایچینده ضرب المثل دی

سؤزوده، اؤزو تک دولغون ـ گؤزل دی

***

رسّام تک شعرده تابلو یاراتدی

طبیعت دادینی ذوق ایله داددی

اقتدارلی شاعر شانین اوجالتدی

بورج آلدیم تعریفین «یحیی شیدا»دان

(ناظر رسام ایدی تابلو یارادان)

***

معرفت گؤزونده اؤلمه ییب ناظر

گؤزومون ائوینده حاضردی؛ حاضر

تعریف ده دیلیم لال؛ قلمیم قاصر

غمین درینلیگین تازا بیلمیشم

میندن بیر نیسگیلین یازا بیلمیشم

***

«اجتهاد»چون «قم»دا دوققوز ایل قالدی

«دانشگاه» مدرکین «تهران»دان آلدی

علمین ذروه سینه قالخدی؛ اوجالدی

اکدیگی باغلارین بارینی دردی

نسیل ـ نسیل اؤیرنجی لر بئجردی

***

شعرین شلاله سی آخار شار ها شار

شاعر اؤز شعری له ابدی یاشار

بو اصله شاهد دی استادیم «افشار»

او دا ناظر سایاق منه عزیز دی

طینتی گؤزلدی طبعی تمیزدی

***

صون یئری «تبریز»ده «وادیِ رحمت»

«مفاخر قطعه»سی جنّت دی جنّت

مولاسی «علی (ع)»ده ائتسین شفاعت

اوندان آلیشارکن شعرین اوجاغی

(جعفری)! صاغالماز ناظرین داغی

بیت الله جعفری ـ تهران ـ منزل شخصی ۱۴۰۰/۰۸/۰۱