(«اورمو»مون تشنه دوداقلاری دوشرکن یادینا
یاش دئمم؛ قان اله یر «تبریز»یمین دیده لری)
تبریزلی استاد «رضا افشار»
تهران ـ ۱۳۹۵/۰۳/۰۴
رضا افشار ـ بیت الله جعفری
قورودو «اورمو گؤلو»؛ اولدو «زلیخا» جگری
کاش وئره «روح الامین»، «یوسف مصر»ه خبری
بو گناه بیزده دی واللّهی طبیعتده دئگیل
حکیم الله آییریب دنیادا خیر ایله شری
هدره یوللاماییب بیر بئله آیات و کتاب
شردن آرتیق ائله ییب خیره دلالت بشری
رای آلان چوخدو؛ ولی سعی ائله ین یوخ آرادا
مگر «ابراهیم» ائده بیر کره «شقّ القمر»ی
نئچه ایل لردی «حسن لو»یه گلیر «زابِ صغیر»
اونادا جن لرین آخرده توخوندو ظفری
شوملاییب؛ شوملایاجاق اولماسا گر ایش ده حساب
وار حساب سیز ایشین آخردا حساب سیز ضرری
تالانیب «آرتیمیا»؛ ایندی طاماح لار دوزادیر
اونودا باده وئرر اوغرو پیشیک لر گزری
داغیلیب ویران اولار مملکت ای اهلِ وطن
هاردا گؤرسز بیر اولوب «زور» ایله «تزویر» و «زر»ی
دنیانین صاحبی وارسا، یئتیر الله صاحابین
ائله دیبدن قوپاریبلار داها یوخدور اثری
(«اورمو»مون تشنه دوداقلاری دوشرکن یادینا
یاش دئمم؛ قان اله یر «تبریز»یمین دیده لری)
«افشار»ین شعرینی تا (جعفری ) تضمین ائله دی
«گون باتان» «گون چیخان»ا یوللادی سوغات هنری
بیت الله جعفری ـ اورمو ـ «انهر» باغی
صبح نمازیندان صورا ـ ۱۴۰۱/۰۵/۲۹
برچسبها: اورمو, افشار, تبریز, گؤل