بار الها بو نه یامان بلادی
کندی آلت ـ اوست ائتدی، شهر تیتره دی
سیلکندی «قارا داغ» ـ «هریز» ـ «ورزقان»
سحردن آخشاما «اهر» تیتره دی
«حق»بنده سین ائتدی چتین امتحان
گؤز یاشی قان اولدی ؛ اورکلر ده قان
بوروندو قارایا گؤزل ورزقان
گون باتان ، گون اورتا ، سحر تیتره دی
گؤرمه ین نه بیلر کی اولموش نه لر؟
اهر کندلرینده زیر اولموش زَبَر
شامین خرابه سی یا هریز ـ اهر؟!
هر بیری بیریندن بتَر تیتره دی
«رسانه»* خبرین ساخلادی گئجه
اونون گئج خبری، گلمه دی وئجه
ناله عرشه چیخدی اونلار گلینجه
دام ـ دووار آلتیندا بشر تیتره دی
آتدی فلک یامان یئردن کمندی
داغیلدی هریزین بره سی ـ بندی
یاریم خرابه دی «اسب خان»** کندی
کندیمیز داغیلدی ، شهر تیتره دی
بیر چوخو آغلادی ، بیر چوخو گولدو***
کیم تؤکدو گؤز یاشین؟ کیم اونو سیلدی؟
اولان اولدو کئچدی، بیلن لر بیلدی
قضا ترسه گلدی، قدَر تیتره دی
بو داغین گؤینه یی هله ده سؤنمز
بره محکم اولسا؛ سو سئله دؤنمز
یارا مرهم اولسا بئله دؤیونمز
دؤیوندو یارامیز، جیگر تیتره دی
حق یار اولسون اونا کی؛ خلقه یاردی
«افشار»ین سؤزلری**** باغریمی یاردی
ـ : (قاراداغ کؤوشه نی داغلی دیاردی
وئرمه دی آهیمیز ثمر، تیتره دی.)
گلدی شوکر آللاها خالقین «رهبر»ی
گؤردو نه اوضاعدی «تهران» دان بری
حق سؤزون یازارکن یاسلی «جعفری»
اورک قوور ائتدیرن کدر تیتره دی
* = صدا و سیما
** = هریز(هریس) یاخینلیغیندا یئرلشمیش محروم و قیراقدا قالمیش بیر کند. ۱۳۷۸ ـ ده همین کندده آذربایجان و تورک دیلی، ادبیاتی و بیر سؤزله مدنیّتی یولوندا بوتون وجودو ایله فعالّت گؤسترن ایلکین لر دیاری ساییلان «تبریز» شهرینده دونیا یا گؤز آچیب، بویا ـ باشا چاتمیش؛ رضا افشارپورون باشچیلیغی ایله «دیل غم» آدلی بیر عاشیق ارکستری یارانیب فعالیّته باشلامیشدیر. من ایسه افشارین بوتون مدنی ـ فرهنگی ایشلرینده کی کیمی بو ایش ده ده اونون یاردیمینا تله سدیم. بو حقده گله جک پست لاریمدا او ایلین مطبوعاتینا دایانیب معلومات لار وئره جگم.
*** = اوچونجو کانالین «خنده بازار» وئرلیشینه اشاره دیر
**** = دونن افشارا زنگ ائدیب و زلزله دن صدمه گؤرموش «بدوستان»، قارا داغ و اسب خان کندی حقینده معلومات ایسته دیم. اونون سؤزلری منی یامان کؤورلتدی. همین شعری اونون سؤزلری تاثیری آلتیندا یازمیشام.
با تشکر از مدیریّت محترم درمانگاه شماره یک تامین اجتماعی تبریز