ایشیق اولسون هر گون، هر آی ـ ایلیمیز
« فیطیـر » بایرامیمیز، اومـود گولومـوز
چیچکلنسین دیله گیمیز ـ دیلیمیز
آیدینلیغا اسسین سحر یئلی میز
مین بئله بایراملار گؤرسون ائلیمیز
گؤروم آباد اولسون« آذربایجان »ی
گونی ـ گوندن سئوسین انسان، انسانی
قضاوتده قاضی ائتسین وجدانی
حقّه دوغرو آیدین اولسون یولوموز
مین بئله بایراملار گؤرسون ائلیمیز
بیر آی اوروج توتدوق، اوخودوق « قرآن »
هوسی قیسسالتدیق، دیرچه لدی ایمان
وئرسین اجریمیزی خالق ِ سبحان
« شیطان »ا یوخوموز ، حقّه بلی میز
مین بئله بایرام لار گؤرسون ائلی میز
بو دوزلرده گلین وئرک ال ـ اله
سئوگی دن عالمه سالاخ ولوله
قوی؛ قایغی شیطانین باغرینی دله
داملالار بیرلشیب قالخسین سئلی میز
مین بئله بایرام لار گؤرسون ائلی میز
وطن بویو دوزن اولسون، داغ اولسون
«دورت بی یانی باغچا اولسون، باغ اولسون»
« شهریار » دئمیشلی : «اوزو آغ اولسون»
باغلانماسین هئچ وقت ایاق ـ الیمیز
مین بئله بایراملار گؤرسون ائلیمیز
« جعفری »یم، وطنداشا قوربانام
وطن سئون ـ ایستی قانلی انسانام
عشـق شـریـعـتم عشـق قـرآنام
« آلله » دئییب ـ آچان همین ـ دیلیمیز
مین بئله بایراملار گؤرسون ائلی میز